SER AMIGOS

SER AMIGOS

Arianna Papini (2012), Título orixinal: É una parola, ilust. Arianna Papini, Italia. Tradución: Manuela Rodriguez, Kalandra editora (2013) Colección: demademora, [28 pp.] (ISBN: 978-84-8464-814-7).

Breve descrición do formato e contido da obra:

 

Álbum ilustrado e interactivo de tapas duras e de tamaño cadrado, con pouca voluminosidade. 

Tanto a cuberta como a contra cuberta están ligadas entre si xa que a imaxe vai dun lado ao outro ocupando así as dúas partes da encadernación. Nelas podemos observar a imaxe dunha balea cun sapo asomándose tra-la súa cabeza. Na cuberta aparece na parte central superior o nome do libro Ser amigos, en letras vermellas e maiúsculas e xusto debaixo o nome da súa autora. Na parte inferior dereita e en letra moi pequeniña atopamos o nome da editorial.

Na contra cuberta, ademais da cola da balea, atopamos na parte superior esquerda e en letras pequenas e brancas, o nome da colección.

Neste caso, nin a cuberta nin a contra cuberta nos dan ningún tipo de pista sobre o que imos a atopar no interior do libro.

O seu interior está cheo de preciosos debuxos con moita cor é moi semellantes a realidade que representan. Todas as imaxes son de diferentes animais que ademais de ser moi realistas esteticamente, tamén tratan de selo á hora de ser equitativos co tamaño, é dicir, os tamaños dos animais, son proporcionais os uns cos outros. Os debuxos, sempre están colocados na parte dereita da dobre páxina mentres que o textos, formado por frases moi curtas, sempre ocupa o lado esquerdo.

Potencialidades

Tendo en conta a frase coa que comeza a obra “Ser amigos é...” xa nos podemos imaxinar de que vai tratar o contido da mesma.

Neste conto, os protagonistas son os animais que aparecen nela, pero a súa vez, a autora tamén nos fai protagonistas aos lectores. Todo o contido do libro está dirixido a todo o mundo, a pequenos pero tamén a grandes. O relato do que a palabra “amizade” significa é tan fermoso como real, é algo que nos atopamos día a día nas nosas vidas, algo que nos fai medrar como persoas.

Ademais da potencialidade principal da obra, de facernos conscientes do que é ser amigos, a autora non deixa de lado outros aspectos como por exemplo adiviñar cales son os animais que aparecen nas páxinas, os cores dos mesmos e como non, tamén os tamaños, xa que como ben dixen na breve descrición, están moi compensados os uns cos outros.

Volvendo ó tema principal do libro, tamén nos atopamos con valores tan importantes como a tolerancia, algo que hoxe en día fainos tanta falta, “ ser amigos é non darlle importancia ao noso aspecto”.

Unha potencialidade máis, tamén sería a repetición, xa que xogando coa frase que da comezo ao libro “ser amigos é...” a mestra ou a persoa que estea contando o conto ós mais pequenos, a pode aproveitar para que a repitan antes de dicir a nova frase.

A súa vez, tamén podemos facernos preguntas, preguntas tales como ¿quen son os meus amigos? ¿como son cos meus amigos?...

¡Adiante, atrévete a reflexionar!